Tirkîya de vîst mîlyonî ra zêdîyêr kurdî estê û mîyanê ziwananê ke tewr zêde ênê qiseykerdişî de kurdkî ziwano dîyin o. Reyna gore raporanê UNESCOyî lehçeyê ziwanê kurdkî sey kirmanckî/zazakî tehlukeyê çinbîyayîşî de rî bi rî mendo. La hîna zî heqê perwerdeyîya ziwanê maye êno binpaykerdene. Çimê ma de seba ke ma bieşkîme ziwanê xo na rewşa xopane ra bixelesnîme, tek rayîr o yo ke ganî ma xo biresnîme domanan. Ma bawer kenîme ke do domanê ma bi saya vateyanê weş û rewanan ê xêzeromanî hîna rehet bieşkerê ziwanê xo yê maye de do têkilîyan ronerê. Coka ma bi na bawerî Şemkur avan kerd. 
 
Ma sey koma ke seba kovara verêne ya mîzah û xêzeromanî ya bi temamî bi kurdkî vejîyena xebetîyena, reyna waşt ke seba domanan kovara verêne ya mîzah û xêzeromanî ya bi temamî bi kurdkî vejîme. Ma baş zanenîme ke her keye de komputur yan zî înternet çin o. La seba ke nika hêzê ma nêşono ci ke ma bi hewayî çapkerdeyî vejîme, ma bi hewayê onlîne dest pê kerd. Armancê ma o yo ke ma bi saya piştîdayîşê şima, kovara xo bi hewayêkê çapkerdeyî zî vejîme û bi nê hewayî xo biresnîme pêro domananê kurdan.

 

Armancê Şemkurî o yo ke hem seba domanan xêzeroman hem zî seba pîlan nimûneyanê tewr vîjnaye û guzîdeyan yê edebeyatê xêzeromanî biweşano.